Der Godi Kehrli

Dr Godi Kehrli vo Niederscherli Fahrt jede Aabe mit em zwänzg ab sächsi Zug für hei Nume n am Fritig fahrt er nid so zitig Wöu sie vor Bude am Fritig ihre Jasshöck hei S'isch Tradition gsii, u Godi's Lohn gsii Für das er süsch am Aabe gäng het zu syr Sippe gha U s'wär so blibe, hät nid d'Klara gschribe Das isch si Schwägere und die het äbe d'Grippe gha Drum het d'Frou Kehrli, die vo Niederscherli Mau ame ne Fritig ihrem Maa i ds Gschäft telefoniert Het gseit "I fahra hüt zu dr Klara Chumm hinech hei, lueg zu de Ching dass ame nüüt passiert" So fahrt haut Kehrli gäg Niederscherli Im zwänzg ab sächsi o am Fritig wie süsch jede Tag Laht's Jasse fahra, wäge der Klara S'isch s'erschte Mal sit mängem Jahr uf hei - E härte Schlag! Jetzt chunnt der Kondi u rüeft i d'Rundi "Das isch e Schnäuzug ohni Halt vo Bärn bis Château Noir" Hingäge Kehrli wett uf Niederscherli U seit "He Kondi, dä vom Schnäuzug isch jo gar nid wahr!" Er söu nid fräch sy, dr zwänzgt ab sächsi Dä göng uf Schwarzeburg am Fritig neuschtens ohni Haut S'isch Godi's Päch gsii, am zwänzgt ab sächsi Isch är am Fritig süsch nid gfahre, jä so geit das haut Dr Godi Kehrli vo Niederscherli Erklärt em Kondi jetzt sii ganz persönlech Sonderfau Wäge dr Klara müess er änder fahra Unger dr Woche hauti dä doch aube überau! Är sig am Fritig süsch haut minger zitig Nume grad hütt müess är am Jüngschte go dr Schoppe gää Me söu doch haute, Gnad vor Rächt lah waute Dr Kondi meint, das chönn er nid uf sini Chappe näh De Chef dä hocki voor i dr Loki Är chönn ja frage, wäge s dünkt ne s gsächi schitter uus Drufabe geit er u zum Füerer seit er: "Du los, da hinge hockt e Maa dää wetti ds Scherli druus" "Är isch am Fritig süsch haut nid so zitig Doch itz isch d'Klara chrank u d'Frou furt u dr Schoppe chaut" De Chef muess lache, seit das sig nid z'mache Un är chönn höchschtens langsam fahre und dänn spring er haut Dr Kondi seit zum Kehrli, s' tüeg em leid wäg Scherli S'gäb kei haut, hingäge wöu me n ihn als treue Chund Nid so la hocke, er söu i d Socke Wiu d' Scherli Bahnhofdurchfahrt chömm i zwo Minute rund Dr Füerer nämm se uf aaune Brämse Denn söu er springe, aber ja nid quer süsch tuets ne schwär So wie dr Zug fahrt sig minger Fluggfahr Und nachhär ränn er no ne bitz näb de Wäge här So chunnt's dass d'Scherli dr Godi Kehrli Dört wo dr Kondi seit "Itz los!" e Sprung vom Trittbrätt tuet Schön längs am Wage, trotz Druck im Mage U nachhär rännt er was er maa u s'düecht ne s'chömi guet Bim letschte Wage ergriift e Maa sii Chrage Lüpft ne i Zug u seit "Heit ihr de Schwein han i nech gseh U sofort gschautet, wüsst ihr dä hautet Am Fritigaabe äbe ds Scherli neutschtens nümme meh!"