清風吹目墘

清風吹焦淚面墘 落葉猶有葉香味 返厝的渡鳥啾啾啼 揣來揣去揣無伊 人生總有離別時 應該快樂等團圓 將你 佇我 心底 藏起 徐徐的清風吹目墘 上媠散步黄昏時 花謝嘛有花香味 返厝的蜜蜂無張持 踅來踅去揣無伊 人生總有離別時 點點滴滴滿心脾 將你 佇我 心底 藏起 徐徐的清風吹目墘 下晡無人鐵路邊 也有田土的氣味 草仔發甲滿滿是 我也快步向前去 人生總有離別時 深深數念無枉費 將你 佇我 心底 藏起 徐徐的清風吹目墘 大樹遮著半爿天 自由自在免提醒 走傱毋捌來懷疑 我也會來綴著你 人生總有離別時 無底的愛上可貴 將你 佇我 心底 藏起 徐徐的清風吹目墘 徐徐的清風吹目墘